《讀者分享》
喺呢個page睇左好多人同長老們既事。特別係而家結左婚生左小朋友，更加感觸，想喺呢度分享下我媽咪既故事，同埋佢點樣幫到我同奶奶既關係。
講少少背景先，我媽咪只係小學畢業，咁多年都係全職師奶，近呢十年仔女都大晒佢先出黎做下兼職。媽咪同好多師奶有差唔多特質：口直心快，勤力，見識唔多，一心一意淨係為仔女。
當我同而家老公拍拖既時候，媽咪同奶奶兩個師奶一見面就好岩key好好傾。可惜媽咪冇耐就患病，好少出街，所以佢同我奶奶只能電話上傾下計。跟住喺我結婚兩年後媽咪就過左身⋯
我發現喺我媽咪同奶奶為數唔多次既見面，媽咪都同奶奶講：阿女嫁去你地屋企我就放心喇、一睇就知你地成家係心地好、你個仔係好仔，家教教得好、我知你一定對我女好⋯大讚特讚，奶奶就好開心（面都紅晒）咁話邊係呢錫新抱係應該既哈哈哈
初頭我只覺得媽咪做咩咁肉麻。但後來我明白媽咪既苦心。要知道我媽一向唔識睇人面色、唔識講好說話、講野直接坦白到得罪人，難得佢咁花式讚人，努力派高帽，為既就係洗我奶奶腦要對新抱好。
確實奶奶對我真係好好，雖然有啲小事上（湊bb手法)大家意見唔同，但感受到佢好盡力對我好。我聽過佢同親戚講，因為親家母已經唔喺度，佢要照顧好我。
由細到大媽咪都同我埋怨我嫲嫲對佢好差（呢個係另一個極長篇故事⋯）媽咪喺婆媳關係上吃過苦，所以我一直以為佢會提醒我小心嫁過去唔好俾人蝦（正如佢後悔當年冇企硬同唔識say no），估唔到由佢出力去幫我⋯雖然咁做好間接亦唔係保證有效，但媽咪作為一個待人處事唔係好有技巧既老人家，為左我已經盡左力。
媽咪過左身兩年啦，太掛住佢所以借呢度抒發下。我自己岩岩生左個女，希望阿女將來夠幸運遇到好老公好婆家，亦都希望我能夠好似媽咪咁保護阿女。
＃我的極品四大長老
Search